Sa 1 Timoteo 3, ibinigay ni Pablo ang mga kinakailangan para sa isang matanda sa simbahan. Sa v2, sinasabi niyang siya ay dapat “sapat na makapagturo” (NKJV). Iyan ay may katuturan. Ang isang lider ng simbahan ay dapat na makapagturo ng wastong doktrina.
Ngunit palagi akong may ilang katanungan tungkol sa kinakailangang ito. Maari bang maging matanda ang isang lalaking matibay sa doktrina ngunit hindi gaanong magaling sa pagtuturo nito sa publiko? Marahil ay kaya niyang talakayin ang teolohiya nang isa-isa, ngunit hindi sa isang grupo. Lahat tayo ay nakatagpo na ng mga lider na ganiyan sa simbahan. Sa 1 Tim 5:17, tahasang binanggit ni Pablo ang mga matatandang “nagtatrabaho sa salita at doktrina,” na nagpapahiwatig na may mga matatandang hindi.
Ang pariralang “sapat na makapagturo” ay mula sa isang solong salitang Griyego. Ang tanging ibang pagkakataong lumabas ito sa BT ay sa 2 Tim 2:24. Doon, sinabi ni Pablong ang lingkod ng Panginoon ay “hindi nararapat na makipagtalo, kundi maamo sa lahat, sapat na makapagturo, matiisin…” Ang iba pang mga kinakailangan para sa isang lingkod ng Panginoon ay tungkol sa kababaang-loob. Ang pagdaragdag ng “sapat na makapagturo” ay tila medyo hindi akma. Mas angkop ang “maaaring maturuan” sa iba pang mga kinakailangan sa talata.
Kamakailan, isang kaibigang mas mahusay ang kaalaman sa Griyego kaysa sa akin ang nagmungkahing ang “sapat na makapagturo” ay hindi ang pinakamahusay na salin ng 1 Tim 3:2. Ang salitang Griyegong isinalin bilang “sapat na makapagturo” ay isang pang-uri. Malinaw, ito ay may kaugnayan sa pandiwang magturo. Ngunit ang aspektong berbal ng pang-uring ito ba ay pasibo o aktibo? (Maaaring maging aktibo o pasibo ang mga pandiwa.)
Kung ito ay aktibo, kung gayon ang “sapat na makapagtuturo” ay magiging katanggap-tanggap na salin. Ngunit kung ito ay pasibo, mas magandang isalin ito bilang “maaaring turuan.” Kung ito ay pasibo, sinasabi ni Pablong ang matanda ay dapat maaaring turuan. Ang matalinong nakatatanda ay nauunawaang hindi niya alam ang lahat. Handa siyang baguhin ang kaniyang pananaw kung ang mga Kasulatan ay hahamon sa anumang mali niyang ideya. Ito ay tiyak na akma sa iba pang mga kinakailangan ng isang lingkod ng Panginoong nakalista sa 2 Tim 2:24. Ang isang nakatatandang maaaring turuan ay mapagpakumbaba.
Kahit na ang salitang ito ay matatagpuan lamang sa dalawang lugar sa BT, ito ay lumalabas sa mga sekular na sulatin na kontemporaryo sa BT. Sa ilang mga lugar, ang salita ay hindi nangangahulugang “sapat na makapagturo,” kundi “tinuruan.” Sa Tito 1:9, ang isang matanda ay inilarawan bilang isang “tinuruan.” Gumamit si Pablo ng isang katulad na salita sa ginamit niya sa 1 Tim 3:2 at 2 Tim 2:24. Ang tanging paraan para matuto ang isang matanda ay kung siya ay maaaring turuan.
Sa 1 Tim 3:2, sinasabi ba ni Pablong ang isang matanda ay dapat marunong magturo o sinasabi ba niyang maaaring turuan? (Marami ang magsasabing pareho!) Kung ang huli, sinasabi ni Pablong ang lider ng isang simbahan ay dapat maging estudyante ng Bibliya. Responsable siya sa pagtuturo sa iba, kaya dapat siyang sumunod sa sinasabi ng Salita at matuto mula rito upang maturuang mabuti ang kawan.
Hindi ako handang magpakamatay dahil dito. Pero gusto ko talaga ang sinabi ng kaibigan ko. Habang ang isang lider ay handang matuto, totoo rin ito para sa lahat ng mananampalataya. Sa aking karanasan, isa sa pinakamalaking hadlang na mayroon ang mga mananampalataya sa pag-unawa sa doktrina ay ang pagkakaroon ng ugaling ayaw maturuan. Maaari tayong mahulog sa bitag ng pag-iisip na alam na natin ang lahat. Narinig natin ang isang bagay mula sa isang kagalang-galang na guro o mangangaral, at iyon na ang nagtakda ng isyu. Ayaw nating pahintulutang baguhin ng mga Kasulatan ang ating paraan ng pag-iisip. Madaling maging matigas ang ulong matuto.
Gusto ba ni Pablong ang pandiwang pang-uri sa 1 Tim 3:2 na magkaroon ng aktibong kahulugan (“sapat na makapagturo”), o isang pasibong kahulugan (“maaaring turuan”)? Sa tingin ko, tama ang kaibigan ko. Pero kahit na iba ang iyong paniniwala, sa tingin ko ay maaari tayong magkasundo na ang isang guro ng Bibliya ay dapat maaaring turuan din.
