Sa military, mayroon kaming iba’t ibang uniporme para sa iba’t ibang okasyon. Para sa mga pormal na pagtitipon, nagsusuot kami ng “dress blues,” ang katumbas sa military ng tuxedo. Ang iba naming uniporme, gaya ng sinusuot naming araw-araw ay hindi akma para sa mga pagtitipong ito.

Kung suot mo ang iyong dress blues, nangangahulugan itong dadalo ka sa isang pagtitipong mayroong panauhing pandangal. Maaaring ito ay kumander ng isang yunit, o ang nakatataas pa sa kaniya. Depende sa sitwasyon, maaaring maupo ka sa kaparehong lamesa ng mga VIP (very important persons) na ito. Sa aking sariling karera, nagsuot ako ng dress blues sa mga pagtitipong may bisitang kongresman, senador o heneral.

Nauunawaan ng mga sibilyan ang aking sinasabi. Marami ang naimbitahan sa isang espesyal na hapunan na may importanteng tao. Isinusuot mo ang pinakamagara mong damit kapag pumupunta ka sa mga lugar na gaya nito.

Sa Roma 13:12, sinabi ni Pablo na may isang napakahalagang pagtitipong mangyayari. Isang VIP ang naroon. Siya ang magiging Panauhing Pandangal. Walang mas hahalaga pa kaysa Personang ito.

Sinabi ni Pablong kailangang nakabihis tayo para sa pagtitipong ito. Hindi niya ginamit ang terminong “dress blues,” ngunit sinabi niyang may mga uri ng damit na kailangan nating hubarin at may uri ng damit na kailangan nating isuot. Ang ibang uniporme ay hindi aakma. Tanging may isang uri ng kasuotan ang babagay.

Ganito ang pagkasabi ni Pablo: “…iwaksi nga natin ang mga gawa ng kadiliman, at ating isakbat ang mga sandata ng kaliwanagan.” Ang pandiwang iwaksi ay ginamit upang ilarawan ang paghuhubad. Ang pandiwang isakbat ay ginamit upang ilarawan ang pagbibihis. Sinasabi ni Pablo na habang nag-aabang tayo sa espesyal na pagtitipong ito, kailangan nating hubarin ang ilang kasuotan at isuot ang ating pinakamahusay na uniporme.

Ano ang araw na iyon? Sino ang Panauhin? At ano ang mga kasuotan?

Ginamit ni Pablo ang araw na pantukoy sa araw ng kaligtasan (13:11). Ito ang araw ng pagbabalik ni Cristo. Sa araw na iyan, ang ating mga katawan ng laman ay wala na. Hindi na tayo magkakasala o makararanas ng poot na dala ng kasalanan sa ating mga buhay.

Ang Panauhing Pandangal ay ang Panginoon mismo. Itatatag Niya ang Kaniyang kaharian at uupo sa Kaniyang luklukan. Sa BT, ang pagdating ng Kaniyang kaharian ay madalas ikumpara sa isang piging (hal Mat 8:11; Heb 1:9).

Ano ang mga kasuotang dapat nating isuot para sa araw na iyan? Sa tingin ko nilarawan ni Pablo ang uniporme sa iba’t ibang paraan sa pasaheng ito. Sa v8, sinabi niyang dapat magmahalan sa bawat isa ang mga mambabasa. Ang buhay na gaya nito ang tumutupad sa kalooban ng Diyos para sa Kaniyang mga anak (v10).

Ilang sitas matapos, sinabi niya sa mga mambabasa na “isakbat” (o isuot na gaya ng damit) ang Panginoong Jesucristo (v14). Ang larawan ay madaling maunawaan. Dapat hilingin ng mga mananampalatayang mamuhay ang Panginoon sa kanilang mga buhay upang Kaniyang matupad ang Kaniyang mga gawa sa kanila. Ang buhay na ito ay mailalarawan ng pag-ibig sa isa’t isa ng mga mananampalataya. Marapat lamang. Inibig Niya tayo.

Kapag inibig natin ang iba, isinusuot natin si Cristo. Ito ay tila pagsusuot ng dress blues. Walang ibang uri ng pamumuhay, o “damit” ang makalulugod sa Kaniya sa Kaniyang pagbabalik. Hindi akmang humarap sa Kaniya sa ibang paraan.

Ang aming uniporme sa pang-araw-araw ay tinatawag naming BDUs. Ang mga ito ay damit camouflage. Hindi namin pinaplantsa ang mga ito. Madalas itong namamantsahan ng dumi o ng pagkain. Kung may mahalagang pagtitipon, hindi kami kailan man dadalo na nakasuot ng BDU.

Tayo ay naghihintay na humarap sa Hari. Nasain nawa nating nakasuot ng maayos kapag Siya ay dumating. Kung mahal natin ang bawat isa, siguradong oo.