“At ang bawat tao na nakikipaglaban sa mga palaruan ay mapagpigil sa lahat ng mga bagay. Ginagawa nga nila ito upang magsipagtamo ng isang putong na may pagkasira, ngunit tayo’y niyaong walang pagkasira” (1 Cor 9:25).

“Nagtutumulin ako sa hangganan sa gantingpala ng dakilang pagtawag ng Diyos na kay Cristo Jesus” (Fil 3:14).

Ang mga Cristiano ay tinakdaang tapusin ang karera ng Cristianong pamumuhay (1 Cor 9:24-27; 2 Tim 4:6-8). Ang lahat ng makatapos sa karera ay magtatamo ng gantimpala (1 Cor 9:25; Fil 3:14).

Ngunit ano ang gantimpala sa pagtatapos ng Cristianong karera?

May dalawang pananaw.

Ang una, na pinanghahawakan ng karamihan sa mga pastor ebangheliko at ng karamihan sa mga Arminiano at mga Calvinista, ay ang gantimpala sa pagtitiis ay ang pinal na kaligtasan. Kung ikaw ay magtitiis, gugulin mo ang eternidad na kasama si Cristo sa Kaniyang kaharian. Kung hindi ka makatiis, gugulin mo ang eternidad sa Lawa ng Apoy.

Ang ikalawang pananaw ay ang gantimpala ay paghaharing kasama ni Cristo. Ang mananampalatayang nakatiis ay maghaharing kasama ni Cristo magpakailan pa man at tatanggap ng mga tiyak na gantimpalang kaakibat ng paghahari (natatagong mana, bunga ng puno ng buhay, espesyal na puting damit, puting bato na may espesyal na ukit). Ang mananampalatayang hindi makatiis ay hindi maghahari. Subalit, siya ay nasa kaharian magpakailan pa man dahil ang kaligtasan ay pinal sa sandaling tayo ay manampalataya kay Jesus (Juan 3:16).

Ano ba ang kaibahan kung iniisip mong ang langit ay isang gantimpalang dapat mapanalunan?

Ito ay isang bagay ng buhay o kamatayan, ng langit o impiyerno.

Halimbawa ikaw ay kumbinsidong ang iyong walang hanggang kapalaran ay nakadepende sa pagtitiis sa pananampalataya at mabubuting gawa. Sa kasong ito, hindi ka naniniwala sa pangako ng Juan 3:16. Maliban na lamang kung ikaw ay naniwala sa pangako sa nakalipas o kaya ay naniwala sa hinaharap, ikaw ay mahihiwalay kay Cristo magpakailan pa man.

Kung ikaw ay isang mananampalatayang nalinlang ng mga huwad na aral sa bagay na ito, ang iyong paglilingkod kay Cristo ay may maling mga motibo. Hinahadlangan mo ang iyong pangkasalukuyan at eternal na mga pagpapala sa iyong pagtanggap ng huwad na evangelio.

Kung ikaw ay isang mananampalatayang nananatiling sigurado sa iyong kaligtasan at naghihintay sa nalalapit na pagbabalik ni Cristo, ikaw ay nagnanasang marinig na sabihin Niya, “Mabuti, tapat na lingkod” (Lukas 19:17). Naghihintay ka ng Kaniyang pagsang-ayon (1 Cor 9:27). Ang iyong buhay ay may kapunuan dahil ikaw ay “naglalakad sa pamamagitan ng pananampalataya at hindi sa pamamagitan ng paningin” (2 Cor 5:7).

Ang buhay na walang hanggan ay isang regalo (Juan 4:10; Ef 2:8-10). Ito ay walang bayad (Pah 22:17). Ito ay hindi gantimpalang matatamo sa pamamagitan ng pakikibaka ng mabuting pakikibaka, ng pagtapos ng karera o ng panghahawak ng pananampalataya.

Mabuting nakatuon ang iyong mga mata sa gantimpala. Ngunit tiyakin mong tamang gantimpala.