Tanungin mo ang sinuman at ang kaniyang sagot ay magbibigay saiyo ng ideya sa kanilang pananaw sa ebanghelyo: Ano ang iyong sasabihin sa isang aktibong homosexual na dapat niyang gawin upang maligtas?

Marami ang nagmumungkahi na ang aktibong homosekwalidad ay isang kasalanan na walang kapatawaran. Marami ang naniniwala na ang isang aktibong homosekswal ay hindi maliligtas. Ang tugon nila sa tanong sa itaas ay kailangan muna nilang itigil ang kanilang homosekswal na gawain, at saka lamang sila makalalagak ng kanilang pagtitiwala kay Kristo upang maligtas.

Ang pananaw na iyan ay nagpapalungkot sa akin. Masakit sa aking loob kapag naririnig ko ang mga tao na nagsasaad ng mga ganiyang bagay. Bakit? Dahil ako ay isa ring makasalanan at kung hindi sa biyaya ng Diyos ako ay patungo sa walang hanggang kaparusahan sa impiyerno.

Kung ang isang bakla o isang tomboy ay hindi makalalapit kay Cristo sa payak na pananampalataya, walang sinumang makasalanan ang makalalapit. Ang Kasulatan ay malinaw sa puntong ito. Isa lamang kasalanan gaano man kalaki ang kailangan upang hatulan ang isang tao sa impiyerno (Galatia 3:10-14). At kahit ang pinakabanal sa mga Kristiyano ay nagkakasala pa rin hanggang siya ay sumama na sa Panginoon (1 Juan 1:8, 10; 3:2).

Kung ang mga aktibong makasalanan ay maaaring maligtas, ganuon din ang mga aktibong homosekswal. Gayundin, kung ang mga aktibong homosekswal ay hindi maliligtas, hindi rin ang sinumang aktibong makasalanan anumang uri ng kaniyang kasalanan. Kung ang mga aktibong homosekswal ay patungong impiyerno, ganuon din tayong lahat.

Ang isang tila problema sa ating pananaw ay tila baga kinukunsinti natin ang kasalanan sa pagsasabi na ang mga aktibong homosekswal ay maaaring maligtas. Subalit, ang akusasyon na ito ay hindi akma dahil hindi natin kinukunsinti ang kasalanan sa buhay ng isang mananampalataya. Nangangaral tayo laban dito. Nananawagan tayo sa mga mananampalataya na sila ay mabuhay sa buong pusong paglilingkod ni Kristo. Nananawagan tayo sa mga Kristiyano na tanggihan ang kanilang mga sarili, pasanin ang kanilang mga krus at sumunod kay Kristo araw-araw. Tinuturuan natin ang mga mananampalataya na maging alagad gaya ng iba. Ang pagkakaiba ay hindi natin tinatawag ang mga hindi mananampalataya na linisin ang kanilang mga buhay para maligtas. Tinatawag natin sila na tanggapin ang libreng regalo ng kaligtasan sa pamamagitan ng paglalagak ng pananampalataya kay Kristo lamang upang iligtas sila.

Ang isa pang tila problema sa pananaw na ito ay ang panawagan ng Kasulatan na huwag makisama sa ibang mananampalataya na sinasadya at hindi nagsisising nagpapakalulong sa mga kasalanang ito na ayon sa Kasulatan ay dapat disiplinahin ng simbahan. Isa sa mga kasalanang ito ay homosekswalidad (tingnan ang salitang pornos sa 1 Corinto 5:11). Ano pala dapat ang ating gawin sa isang bagong Kristiyano na aktibong homosekswal? Minumungkahi ko na sila ay tratuhin na gaya ng ibang bagong mananampalataya. Kailangan natin silang bigyan ng aral, pagpapasigla, pag-ibig, pag-aaruga, pakikisama at panahon para lumago. Ang 1 Corinto 5:11-12 ay hindi tumutukoy sa mga bagong Kristiyano na nagsisimula pa lamang na wakasan ang mga gawi ng kanilang lumang pagkatao. Ito ay tumutukoy sa mga mananampalataya na suwail, palaban at hindi nagsisising lumalakad sa kanilang lumang pagkatao.

Importante ring pansinin na binabanggit ni Pablo sa 1 Cor 5 na may bahagi (i. e. nasa “loob”) ng katawan ni Kristo sa Corinto na aktibong nakikiapid, mga lasenggero at iba pa (1 Corinto 5:12; tingnan din ang 5:1-5; 6:15-20; 11:21, 30). Hindi niya kinukwestiyon ang kanilang kaligtasan. Kinukwestiyon niya, sa halip, ang kanilang karapatan na makisama sa ibang mananampalataya habang sila ay nasa lugar ng suwail na hindi pagsunod.

Hayaan ang sinuman, kasama na ang mga homosekswal, na nais uminom ng tubig ng buhay na mag-aalis ng uhaw ng kanilang mga uhaw na kaluluwa, na lumapit at uminom ng libre at malaya (Juan 4:10; Pah 22:17). Sinumang sumampalataya sa Kaniya- kabilang na ang mga homosekswal- ay hindi mapapahamak ngunit mayroong buhay na walang hanggan (Juan 3:16).