Bilang isang dating chaplain sa military, at bilang isang sibilyang kasalukuyang naggugugol ng maraming oras sa pagtalakay ng teolohiya sa iba, mayroon ako laging nasasalubong na teolohiya, higit sa iba pa. Ang iba ay tinatawag itong Calvinismo. Ang iba ay tinatawag itong Lordship Salvation.

Anumang pangalan ang itawag dito, isa sa mga aral nito ay ang tunay na mananampalataya ay susunod sa Panginoon. Oo, sasabihin nila, maaaring matisod ang isang mananampalataya paminsan-minsan. Ngunit pansamantala lamang ang mga kabiguang ito. Hindi ba lahat ay nagkakasala. Hindi sila magpapakasama nang husto o magpapatuloy nang matagal. Walang nagpaliwanag kung gaano kasama ang “masama” o gaano katagal ang “matagal,” pero ang basikong punto ay pareho: Ang tunay na mananampalataya ay gagawin ang inutos ng Panginoong gawin nila. Ito ang uri ng buhay na isasapamuhay ng bawat Cristiano.

Namamangha ako na ang mga nanghahawak sa teolohiyang ito ay hindi nakikita ang mga problema rito. Ito ay nangangailangan ng malaking bahagi ng panlilinlang sa sarili; kailangang maging bulag ang isang tao sa dami ng kasalanan sa kaniyang buhay. Kailangan niyang sabihing ang kaniyang kasalanan ay hindi masyadong masama at hindi siya nakibaka rito nang matagal. Pinaaalala nito sa akin ang isang pinunong Iraqi nang may digmaan sa kaniyang bansa. Pinapanayam siya habang nasusunog ang bansa sa paligid niya. Ngunit sinabi niya sa mamamahayag na ang lahat ay maigi at dudurugin ng Irag ang US at kaalyado nito. Nangyari ito mahigit tatlumpong taon na ang nakaraan, ngunit hanggang ngayon tampulan pa rin siya ng biro. Siya ay naging kasabihan para sa isang taong walang alam sa kung anong nangyayari sa kaniyang paligid.

Marahil lahat tayo ay makakaugnay sa sitwasyong ito. Maaari nating linlangin ang ating mga sarili at maging bulag sa mga salungatan sa ating mga buhay. Makikita natin ang mga gusto nating makita ngunit babalewalain ang mga gusto nating balewalain. Mabuti na lamang at karamihan sa mga bagay na ito ay hindi kasinlala ng mga sitwasyong may kinalaman sa digmaan!

Subalit minsan, napipilitan tayong makita ang ayaw nating makita. Ginagawa ito ng Kasulatan para sa atin. Ito ay higit na totoo kapag tayo ay nanghahawak sa maling teolohiya.

Isang punto ay ang Lukas 6:46. Kung sinasabi ng isang taong lahat ng Cristiano ay susunod sa Panginoon, ang mga salita ni Cristo ay sampal sa kaniyang mukha. Kausap ng Hari ang Kaniyang mga alagad (v20). Sinasabihan Niya silang gawin ang ilang mga bagay (v21-45). Marahil ang ilan sa mga mananampalatayang ito ay iniisip na ginagawa nila ang lahat ng mga bagay na ito. Marahil iniisip nilang bagama’t paminsan-minsan sila ay napapamali, hindi ito masyadong masama o hindi sila nagkakasala nang matagal.

Ngunit inaalis ng Panginoon ang mga panlilinlang natin sa ating sarili. Sinabi niya, “Bakit ninyo akong tinatawag na ‘Panginoon, Panginoon,’ kung hindi naman ninyo ginagawa ang Aking sinasabi?”

May ililinaw pa ba Siya na ang mga mananampalataya ay maaaring sumuway sa Kaniya? Kapag binasa natin ang mga bagay na Kaniyang pinag-utos na gawin sa Lukas 6:21-45, malinaw na maraming mananampalataya ang hindi gumagawa ng Kaniyang pinag-uutos. Sinabi Niya sa kanila (bukod sa iba pang bagay) na maging mapagkumbaba, na magalak kapag sila ay dumaraan sa paghihirap sa buhay, na mahalin ang kanilang mga kaaway, na ipanalangin ang nagmamalupit sa kanila, na patawarin ang mga nagkasala sa kanila, na huwag maging mapagpuna ng iba, at na makita ang ibang mas maiigi kaysa kanilang mga sarili.

Sino ang makakatingin sa listahang ito at magsasabing, “Sagot ko ang lahat ng mga ito. Hindi ako masyadong masama. Kapag ako ay napapamali, hindi ko ito ginagawa nang matagal”? Hindi ko maiwasang makita ang larawan ng pinunong Iraqi na nagsasabing, “Ang lahat ay maigi,” samantalang ang Baghdad ay nasusunog hanggang lupa.

Hindi awtomatikong namumuhay ang mga Cristiano ng maka-Diyos na pamumuhay. Kung ito ang sinasabi ng iyong teolohiya, magmasid ka sa paligid. Masusumpungan mong sinusuksok mo ang iyong nakikita sa iyong buhay at sa buhay ng iba sa iyong teolohiya. Ikaw ay isang malaking tampulan ng biro gaya ng pinunong Iraqi.

Kung nanampalataya ka kay Jesus para sa buhay na walang hanggan, taglay mo ang kahanga-hangang kaloob na ito. Ngunit ang pagsunod sa Kaniya ay hind awtomatiko. Siya na mismo ang nagsabi nito sa Kaniyang mga alagad. Lumapit ka sa Kaniya at humingi ng Kaniyang biyaya at lakas upang makapamuhay ng isang buhay na nakapupuri sa Kaniya. Kung gagawin mo ito, makikita mo ang mga bagay kung ano ba talaga ang mga ito.